गडचिरोली,दि.13- दोन मेहुण्यांनी मिळून भावोजीला धारदार शस्त्रानं भोसकून हत्या केल्याची धक्कादायक घटना समोर आली आहे. गडचिरोली जिल्ह्यातील सिरोंचा येथील ही घटना आहे. बहीण-भावोजीमध्ये भांडण झाल्यानंतर बहिणीने कीटकनाशक घेऊन आत्महत्या केली. मात्र तिला पतीनंच मारल्याच्या संशयातून दोन मेहुण्यांनी त्याला मारहाण करत व चाकूने भोसकलं. धक्कादायक बाब म्हणजे ही सर्व घटना रुग्णालय परिसरातच घडली. मंगळवारी (13 मार्च) सकाळी 8.30 वाजण्याच्या सुमारास सिरोंचा येथे ही घटना घडली.
राजण्णा नामला (वय 32 वर्ष) असे हत्या करण्यात आलेल्या तरुणाचे नाव आहे. 8 वर्षांपूर्वी त्याचे संध्याराणी (वय 25 वर्ष)सोबत लग्न झाले होते. त्यांना दोन मुले होती. पण दोघांमध्ये नेहमी वाद होत असत. सोमवारी दुपारी 3 वाजण्याच्या सुमारासही त्यांच्यात भांडण झालं, मात्र यावेळी संध्याराणीनं घरातील कीटकनाशक पिऊन स्वतःचे आयुष्य संपवले. यानंतर तिला सिरोंचा येथील ग्रामीण रूग्णालयात उपचारांसाठी दाखल करण्यात आले. मात्र रुग्णालयात तिचा मृत्यू झाला. मंगळवारी सकाळी तिचे शवपरिक्षण सुरू असताना संध्याराणीचे दोन भाऊ आणि माहेरच्या काही लोकांची राजण्णासोबत रुग्णालयाच्या गेटवरच बाचाबाची झाली. यावेळी राग अनावर झालेल्या माहेरच्या लोकांनी राजण्णाला जबर मारहाण केली तर संतोष (30) व रमेश लखमय्या सोदारी (28) या भावंडांनी त्याला चाकूने भोसकले.
यात राजण्णाचा जागीच मृत्यू झाला. बहिणीच्या मृत्यूला राजण्णाच कारणीभूत असल्याने त्याची हत्या केल्याची कबुली देत दोन्ही भावांनी पोलिसांकडे आत्मसमर्पण केले. या घटनेमुळे राजण्णा व संध्याराणी यांच्या दोन्ही मुलांवरील आईवडिलांचे छत्र हिरावले गेले आहे.
