गोंदिया,दि.8 : भंडारा-गोंदिया लोकसभा पोटनिवडणुकीसाठी राष्ट्रवादी काँग्रेस व काँग्रेसचे उमेदवाराची अखेर घोषणा करण्यात आली. माजी आमदार मधुकर कुकडे यांना राष्ट्रवादी काँग्रेसने उमेदवारी जाहीर केली आहे. यामुळे गेल्या अनेक दिवसांपासून ताणलेली उत्सुकता संपली आहे.राष्ट्रवादीकडून उमेदवार कोण? याबद्दलही उत्सुकता होती. राष्ट्रवादीचे ज्येष्ठ नेते प्रफुल्ल पटेल यांच्या पत्नी वर्षा पटेल, विजय शिवणकर, मधुकर कुकडे, सुनील फुंडे यांची नावे चर्चेत होती. परंतु पटेल व पटोले यांनी कुकडे यांना झुकते माप देत 2019 च्या लोकसभा निवडणुकीतील निकालाचे चित्र आजच्या उमेदवारीने स्पष्ट केले आहे.ही निवडणुक राष्ट्रवादीच्या उमेदवाराकडे बघता फक्त औपचारिकताच राहणार आहे.
भंडारा-गोंदिया पोटनिवडणुकीत राष्ट्रवादीचे उमेदवार मधुकर कुकडे
भाजपने हेमंत पटले यांची उमेदवारी जाहीर केल्यानंतर राष्ट्रवादी काँग्रेसने मधुकर कुकडे यांची उमेदवारी जाहीर केली. मधुकर कुकडे भंडारा राष्ट्रवादी काँग्रेसचे जिल्हाध्यक्ष आहेत. ते 1995 मध्ये पहिल्यांदा तुमसर (जि. भंडारा) विधानसभा मतदारसंघातून भाजपचे आमदार म्हणून निवडून आले होते. त्यानंतर सलग तीनवेळा ते भाजपचे आमदार झाले. 2009 मध्ये तुमसर मतदारसंघ अनुसूचित जातीसाठी राखीव झाल्याने त्यांना उमेदवारी मिळू शकली नाही.नाना पटोले व प्रफुल्ल पटेल यांचे विश्वासू माजी आमदार राजेंद्र जैन यांनी मधुकर कुकडे यांना दूरध्वनी करून लोकसभा निवडणुकीसाठी अर्ज भरण्याची तयारी करा, असे सांगितल्यानंतर कुकडे यांच्या नावावर शिक्कामोर्तब झाले.
विजय शिवणकर व सुनिल फुंडे जर उमेदवार राहिले असते तर भाजपला ही निवडणुक अडचणीची ठरली असती त्याचा विचार भाजप व राष्ट्रवादीच्या नेत्यांनी वरच्यापातळीवर केल्याची चर्चा आहे.तर पटोलेंना या माध्यमातून पटकनी देण्यात आली आहे.कारण राष्ट्रवादी ही जागा जिंकण्याची शक्यताच सध्याच्या घडीला राहिलेली नसून प्रफुल पटेलांनी पटोलेंना शांत करीत भाजपच्या विजयाचा मार्ग सुकर केल्याने नाना पटोलेंचेही वजन असेच कमी झाले आहे.