मानसी अशोक जोनवाल, असे या मृत विद्यार्थिनीचे नाव आहे. मानसीला १२ वीला ७२% गुण मिळाले होते. १२ वी उत्तीर्ण झाल्यानंतर पाहिजे त्या महाविद्यालयामध्ये प्रवेश न मिळाल्याने तिने महाविद्यालयात प्रवेश घेतला नव्हता. तेव्हापासून ती घरीच होती. तसेच तिला मोबाईलवर गेम खेळण्याचीही सवय होती. महाविद्यालयात प्रवेश न घेतल्याने तिला मित्र-मैत्रिणीही फार नव्हत्या. मात्र, परिसरातील लोक आणि शेजाऱ्यांसोबत ती हसत खेळत राहायची. ती जास्तीत जास्त वेळ मोबाईलवर घालवायची, असेही सांगितले जात आहे.
या प्रकरणी पोलिसांनी तक्रार दाखल केली आहे. मानसीच्या हातावर कट हिअर टू एक्झिट असे लिहिले आहे. त्यामुळे ब्लु व्हेल किंवा तशाच कुठल्या गेममुळे मानसीने आत्महत्या केल्याची शक्यता नाकारता येत नाही, अशी माहिती पोलीस उपायुक्त निलेश भरणे यांनी दिली. ब्लु व्हेल गेम खेळत असताना त्यामध्ये काही स्टेज आणि चॅलेंजेस असतात. त्यामध्ये शेवटच्या स्टेजमध्ये तुम्हाला जीवन संपवून चॅलेंज पूर्ण केल्याची पुष्टी द्यावी लागते. त्याच प्रकारची ही घटना आहे, असा संशय पोलिसांनी व्यक्त केला आहे.