विदर्भ कुस्तीची पंढरी होईल – पालकमंत्री सुधीर मुनगंटीवार

वर्धा,दि. ३०: आपल्या देशात प्राचीन काळापासून कुस्ती या खेळाला राजाश्रय होता, मात्र अलीकडच्या काळात कुस्तीला राजाश्रय कमी पडला. खासदार रामदास तडस यांच्यासारख्या कुस्तीवर प्रेम करणाऱ्या नेत्यांनी विदर्भात कुस्तीला रुजविण्यासाठी घेतलेला पुढाकार हा एक दिवस विदर्भाला कुस्तीची पंढरी केल्याशिवाय राहणार नाही, असे प्रतिपादन वित्त व नियोजनमंत्री तथा जिल्ह्याचे पालकमंत्री सुधीर मुनगंटीवार यांनी केले.
देवळी येथे नगर परिषद प्रांगणात आयोजित महाराष्ट्र राज्य कुस्तीगीर परिषद, वर्धा कुस्तीगीर परिषद आणि सार्वजनिक बजरंग व्यायाम शाळेच्या वतीने आयोजित २१ वी वरिष्ठ महिला व तिसरी सब ज्युनियर महिला राज्यस्तरीय अजिंक्यपद कुस्ती स्पर्धेचा बक्षीस वितरण समारंभ, राज्य शासन वैशिष्ट्यपूर्ण निधी मधून बांधण्यात आलेल्या नवीन स्टेडीयमचे लोकार्पण आणि वैशिष्ट्यपूर्ण निधीतून १० कोटी रुपयांच्या विविध विकास कामांचे भूमिपूजन, शाहिद स्मारकाचे लोकार्पण कार्यक्रम पार पडला, यावेळी श्री. मुनगंटीवार बोलत होते. या समारंभाला खासदार रामदास तडस, आमदार रामदास आंबटकर, देवळीच्या नगराध्यक्ष सुचिता मडावी, राज्य कृषी मूल्य आयोगाचे सदस्य प्रशांत इंगळे, शोभा तडस, नांदगाव खंडेश्वरचे नगराध्यक्ष संजय पोकळे, सुनील गफाट आदी उपस्थित होते.
खेलो इंडियाच्या माध्यमातून देशात खेळाचे वातावरण आणि खेळाडू तयार करण्याचे प्रयत्न होत आहेत. देशाची खेळातील प्रगती पाहता पुढील दहा वर्षांत ऑलिम्पिकमध्ये सर्वात जास्त पदके मिळविण्यात आपला देश दुसऱ्या क्रमांकावर राहिल यात शंका नाही, असे श्री मुनगंटीवार म्हणाले. चंद्रपूरसारख्या जिल्ह्यातील आदिवासी मुले – मुली २९ हजार फूट उंचीवर आपला तिरंगा फडकवण्याची कामगिरी करतात. याचा अर्थ विदर्भातही चांगले खेळाडू घडविण्याची शक्ती आहे. अशा स्टेडियमच्या माध्यमातून विदर्भात उत्तम खेळाडू तयार होतील असा आशावाद त्यांनी व्यक्त केला. कुस्तीसाठी इनडोअर स्टेडियमसाठी ५ कोटी रुपये निधी देण्याची घोषणा त्यांनी यावेळी केली. या निधीतून उत्कृष्ट इनडोअर स्टेडियम तयार करावे. तसेच कुस्ती व कबड्डीची मॅट खरेदी करण्यासाठी सुद्धा १४ लक्ष रुपयांचा निधी उपलब्ध करून देण्याची हमी त्यांनी यावेळी दिली. या स्टेडियमच्या माध्यमातून विविध खेळाचे खेळाडू तयार होतील. कुस्ती खेळणाऱ्या मुलींसाठी वित्तमंत्री म्हणून काही करता आले तर यासारखा दुसरा आनंद असणार नाही. कुस्तीच्या प्रचार- प्रसारासाठी काम करणारा नेता म्हणून खासदार तडस यांची ओळख आहे. ती ओळख त्यांनी अशीच कायम ठेवावी अशा शुभेछा त्यांनी यावेळी दिल्यात. तसेच विविध जिल्ह्यातून आलेल्या कुस्तीगीरांना त्यांनी उत्कृष्ट खेळ करण्यासाठी शुभेच्छा दिल्या.