अर्जुनी मोरगाव,दि.13 : येथील पशुवैद्यकीय चिकित्सालयाच्या प्रांगणात स्वातंत्र्यसंग्राम सैनिकांचे दोन हुतात्मा स्मारक स्तंभ असून त्यावर हुतात्मा झालेल्या स्वातंत्र्यसंग्राम सैनिकांचे नावे कोरलेली आहेत. नवतरुणांना चेतना व प्रेरणा देणारे हे हुतात्मा स्मारक पूर्णत: मोडकळीस आले असून दोन्ही स्तभांना भेगा पडल्या आहेत. हे स्तंभ कधीही पडू शकतात. या हुतात्मा स्मारकासाठी स्वतंत्र शासकीय जमीन देण्यात यावी. यासाठी महाराष्ट्र राज्य तथा गोंदिया जिल्हा स्वातंत्र्यसंग्राम सैनिक उत्तराधिकारी संघटनेच्या माध्यमातून वरिष्ठ अधिकारी, मुख्यमंत्री, राज्यपाल, आयुक्त, जिल्हाधिकारी यांच्याकडे अनेकदा पत्रव्यवहर करून मागणी करण्यात आली. मात्र, जिल्हाधिकारी कार्यालय गोंदिया यांच्याकडून कुठलीच कार्यवाही होत नसल्याची तक्रार स्वातंत्र्यसंग्राम सैनिक उत्तराधिकारी संघटनेचे अध्यक्ष रमेश मेश्राम यांनी केली आहे. .
या संदर्भात म.रा. स्वातंत्र्यसंग्राम सैनिक व गोंदिया जिल्हा स्वातंत्र्यसंग्राम सैनिक उत्तराधिकारी संघटनेने वर्ष २०११ पासून या हुतात्मा स्मारकाला वेगळी जमीन मिळूून त्यांचे सौंदर्यीकरण व्हावे म्हणून अनेकदा जिल्हाधिकारी गोंदिया यांच्याकडे पत्रव्यवहार केला. तसेच वित्त व नियोजन तथा वनमंत्री सुधीर मुनगंटीवार, विभागीय आयुक्त तसेच मुख्यमंत्री सचिवालयाच्या मुख्य कार्यकारी आशा पठाण यांच्याकडे पत्रव्यवहार केला. तसेच राज्यपालांनी एका आदेशान्वये या मागणीकडे जातीने लक्ष देण्याचे जिल्हाधिकारी गोंदिया यांनाही कळविले आहे. मात्र, राज्यपालांच्या आदेशाचीही इथे अवहेलना होत असल्याचा गंभीर आरोप संघटनेचे रमेश मेश्राम यांनी केला आहे. .
