गोंदिया,(berartimes.com) दि. ३० :-कोणताही आजार हा श्रीमंत आणि गरीब असा भेदभाव करीत नाही. श्रीमंत व्यक्तीला जर हृदयरोग,मुत्रपिंड,मेंदू,व मज्जासंस्थेचे आजार झाले तर, तो त्याच्या आर्थिक परिस्थितीमुळे महागडे उपचार व शस्त्रक्रिया करु शकतो. परंतु जे व्यक्ती गरीब आणि दारिद्रय रेषेखाली जीवन जगत आहेत अशांना जर हृदयरोग ,मेंदु,मज्जासंस्थेचे विकार आणि मुत्रपिंड प्रत्यारोपणाची आवश्यकता पडली तर त्यांना महागडे उपचार व शस्त्रक्रिया करणे आर्थिकदृष्टया शक्य होत नाही. अशा परिस्थितीमुळे त्यांना शेवटपर्यत आजारांना सोबत घेऊन जीवन जगावे लागते. जिल्हयातील गोरगरीब दारिद्रय रेषेखाली जीवन जगणा-या रुग्णांसाठी राजीव गांधी जीवनदायी आरोग्य योजना ख-या अर्थाने जीवनदायी ठरली आहे. आता ही योजना ४ ऑगस्ट २०१६ पासून महात्मा फुले जन आरोग्य योजना म्हणून राज्यात लागू झाली आहे.
राज्य शासनाने एक महत्वपुर्ण निर्णय घेऊन दारिद्रय रेषेखाली जीवन जगणा-या व्यक्तिला हृदयरोग,मेंदु,मज्जासंस्थांचे विकार आणि मुत्रपिंडाच्या प्रत्यारोपणाचे उपचार व शस्त्रक्रियेसाठी राजीव गांधी जीवनदायी आरोग्य योजनेचा लाभ देण्याचा निर्णय घेतला. जिल्हयातील तब्बल ८३७७ रुग्णांसाठी ही योजना जीवनदायी ठरली आहे. जिल्हयातील व जिल्हयाबाहेरील या योजनेअंतर्गत निवड केलेल्या खाजगी व शासकिय रुग्णालयातून या रुग्णांनी उपचार व शस्त्रक्रिया केल्या आहेत. या रुग्णांच्या आजारावरील महागडे उपचार व शस्त्रक्रियेचा खर्च राज्य शासनाने केल्यामुळे रुग्णांना मोठा दिलासा मिळाला आहे.
राजीव गांधी जीवनदायी योजनेचा लाभ दारिद्रय रेषेखालील पिवळया शिधापत्रिकाधारक कुटुंबाबरोबरच अंत्योदय अन्न्‍ योजना,अन्नपुर्णा शिधापत्रिकाधारक आणि दारिद्रय रेषेवरील केशरी रंगाच्या शिधापत्रिकाधारक कुटुंबे ज्यांचे वार्षिक उत्पन्न १ लक्ष रुपये किंवा त्यापेक्षा कमी आहे अशी आरोग्य ओळखपत्रे असणारे कुटुंब या योजनेचा लाभ घेण्यास पात्र आहे.
२१ नोव्हेंबर २०१३ ते २८ ऑगस्ट २०१६ या कालावधीत जिल्हयातील ८३७७ रुग्णांवर राजीव गांधी जीवनदायी आरोग्य योजनेअंतर्गत जिल्हयात व जिल्हयाबाहेरील रुग्णालयात उपचार व शस्त्रक्रिया करण्यात आल्या. यावर १६ कोटी १३ लक्ष २१ हजार ७१५ रुपये खर्च करण्यात आले. या योजनेअंतर्गत जळालेले रुग्ण ,कार्डिओलॉजी,क्रिटीकल केअर,ईएनटी सर्जरी,इन्डोक्रीनोलॉजी ,जनरल मेडिसीन,गॅस्टड्ढो ऐन्टड्ढोलॉजी ,जनरल सर्जरी, जेनेटोरिनरी सिस्टिम, गायनॉकोलॉजी ॲण्ड ऑबस्टेस्टड्ढीक्स,सर्जरी, नेफ्रोलॉजी,न्युरॉलॉजी, न्यूरोसर्जरी,ऑप्थॅलमोलॉजी सर्जरी, ऑर्थोपेडीक सर्जरी ॲण्ड प्रोसिजर्स , पेडिॲटड्ढीक सर्जरी, पेडिॲटड्ढीक मेडिसीन मॅनेजमेंट,पॉलीटड्ढॅऊमा, प्रोस्थेसीस, पलमोनोलॉजी, रिमॅथोलॉजी , सर्जीकल ग्रॅस्टो एन्टरोलॉजी, व सर्जीकल ऑनकोलॉजी अशा प्रकारचे उपचार व शस्त्रक्रिया करण्यात आल्या.
जिल्हयात या योजनेअंतर्गत उपचार व शस्त्रक्रियेसाठी निवड करण्यात आलेल्या खाजगी , व शासकिय रुग्णालयातून २६२८ रुग्णांवर उपचार व शस्त्रक्रिया करण्यात आल्या. या उपचार व शस्त्रक्रियेचा खर्च ३ कोटी ८० लाख १५ हजार ४०० रुपये, तर जिल्हयाबाहेरील खाजगी , विश्वस्त संस्थांचे रुग्णालय व शासकिय रुग्णालयातून जिल्हयातील ५७४९ रुग्णांनी उपचार व शस्त्रक्रिया केल्या. यासाठी शासनाने १२ कोटी ३३ लाख ६ हजार ३१५ रुपये रुग्णांवर खर्च केले. जिल्हयातील उपचार व शस्त्रक्रिया केलेल्या २०५१ रुग्णांचा २ कोटी ५९ लक्ष १७ हजार ५५१ रुपये आणि जिल्हयाबाहेर उपचार व शस्त्रक्रिया केलेल्या ४६४६ रुग्णांचा ९ कोटी ९ लाख १६ हजार २४५ रुपये खर्च शासनाने संबंधित रुग्णालयांना दिला आहे. उर्वरित ५७७ व ११०३ रुग्णांवरील उपचार व शस्त्रक्रियेचा खर्च देण्याची कार्यवाही करण्यात येत आहे.
