हैदराबाद दि. २3(वृत्तसंस्था) :- आंध्र प्रदेशच्या विशाखापट्टनम जिल्ह्यात सत्ताधारी तेलुगू देसम पार्टीच्या दोन नेत्यांची हत्या करण्यात आली आहे. पोलिसांनी दिलेल्या माहितीनुसार, (TDP) चे आमदार के. सर्वेश्वर राव आणि माजी आमदार सिवेरी सोमा यांचा नक्षलवाद्यांनी गोळ्या झाडून खून केला. विशाखापट्टनमपासून 125 किमी दूर असलेल्या थुटांगी गावात ही घटना घडली. राव अराकू विधानसभा मतदार संघातून आमदार होते. अराकू येथे एका कार्यक्रमात सहभागी होण्यासाठी जात असताना त्या दोघांना अचानक नक्षलवाद्यांनी अडवले आणि त्यांच्यावर अगदी जवळून हल्ला केला.
विशेष म्हणजे महिला माओवाद्यांनी हा हल्ला केल्याची माहिती आहे. एओबी माओवादी संघटनेचे सचिव रामकृष्णा यांच्या नेतृत्वात 50 महिला माओवाद्यांनी आमदार सर्वेश्वर, माजी आमदार सोमा आणि त्यांच्या कार्यकर्त्यांवर हल्ला चढवला. दरम्यान, किडारी सर्वेश्वर यांनी 2014 च्या निवडणुकीत वायएसआर पक्षाकडून उमेदवारी मिळवत विजय मिळवला होता. त्यानंतर, सर्वेश्वर यांनी चंद्राबाबू नायडूच्या तेलगू देसम पक्षात प्रवेश केला होता.
यापूर्वीच मिळाल्या होत्या धमक्या
पोलिसांनी सांगितले, की राव 2014 मध्ये वायएसआर काँग्रेस पार्टीकडून अनुसूचित जमातीसाठी आरक्षित असलेल्या अराकू विधानसभा मतदार संघातून निवडून आले होते. त्यांनी आपले प्रतिस्पर्धी टीडीपी नेते सोमा यांनी पराभूत केले होते. 2016 मध्ये राव यांनी टीडीपीमध्ये सामिल होण्याचा निर्णय घेतला होता. सोमा आणि राव या दोघांना यापूर्वीच नक्षलवाद्यांकडून जिवे मारण्याच्या धमक्या मिळाल्या होत्या. त्यात रविवारी त्या दोघांना मोठ्या संख्येने आलेल्या नक्षलवाद्यांनी वाटेतच अडवले आणि दोघांवर गोळीबार केला.
