दसर्‍यानंतर राज्य मंत्रिमंडळाचा विस्तार..मुख्यमंत्र्यांचे सोलापुरात वक्तव्य

सोलापूर,दि.17- राज्यमंत्रीमंडळाचा लवकरच विस्तार होणार असल्याचे सुतोवाच मुख्यमंत्र्यांनी केले आहे. मात्र, माजी महसूलमंत्री एकनाथ खडसेंचा पुनर्प्रवेश होणार का? असा प्रश्न विचारला असता, मुख्यमंत्री देवेंद्र फडणवीस यांनी सावध पवित्रा घेत, मंत्रीमंडळात कोण कोण असेल अथवा कुणाला बढती मिळेल हे योग्यवेळी सांगू, असे वक्तव्य केले आहे. दुष्काळाचा आढावा घेण्यासाठी मुख्यमंत्री आज सोलापूरात आले होते. त्यावेळी आयोजित पत्रकार परिषदेत मुख्यमंत्री बोलत होते.

दुष्काळासह विविध विकास योजनांवर मुख्यमंत्र्यांनी जिल्हाधिकारी कार्यालयातील सभागृहात बंदद्वार अधिकार्‍यांशी चर्चा केली.दरम्यान, सोलापूर विमानतळाकडे मुख्यमंत्र्यांचा जाणारा ताफा अडवण्यासाठी राष्ट्रवादीचे कार्यकर्ते जमले होते. पोलिसांनी काही कार्यकर्त्यांना घेतले आहे. यापार्श्वभूमीवर जिल्हाधिकारी कार्यालय परिसरात कडेकोट बंदोबस्त तैनात करण्यात आला होता.दरम्यान, मुख्यमंत्र्यांच्या भेटीसाठी जाणार्‍या युवक काँग्रेसच्या कार्यकर्त्यांना पोलिसांनी रोखल्याने या कार्यकर्यांनी काँग्रेस भवन कार्यालयात निदर्शने केली. मराठा, धनगर, मुस्लीम व कोळी समाजास तातडीने आरक्षण द्यावे, जिल्हा दुष्काळग्रस्त जाहीर करून शेतकर्‍यांना मदत करावी, घरपोच दारू विकण्याचा निर्णय रद्द करावा, अशा मागण्या हे कार्यकर्ते करत होते.