चंद्रपूर,दि.08 : जिल्ह्यातील चिमूर वनपरिक्षेत्रातील मेटेपार गावालगत असलेल्या नाल्याजवळ वाघिणीसह दोन बछडे मृतावस्थेत आढळून आल्याची घटना सोमवारी सकाळी उघडकीस आली आहे. यात एक वाघीण व तिचे दोन बछडे असून ते आठ ते नऊ महिन्याचे आहे. यासंदर्भात वनविभागाचे अधिकारी घटनास्थळाकडे रवाना झाले असून त्यांचा मृत्यू कशाने झाला याचा शोध घेतला जात आहे.काहीजण जांभळाच्या झाडावरून जांभळं तोडायला गेले असता त्यांना तेथे वाघिणीसह दोन बछडे मृतावस्थेत आढळले. त्यांनी तात्काळ ही माहिती शंकरपूरच्या पर्यावरणवादी मंडळाच्या अमोद गौरकर या वन्यजीवप्रेमी तरुणाला दिली. अमोद गौरकर यांनी घटनास्थळी जाऊन पाहणी केली असता, जवळच एक चितळ मृतावस्थेत आढळून आले. या चितळाचे दोन पाय तुटलेल्या अवस्थेत होते. त्यामुळे या वाघिणीने व तिच्या बछड्यांनी या मृत चितळाला खाल्ल्याने त्यांना विषबाधा होऊन ते मृत झाले असावे असा प्राथमिक अंदाज आहे. ब्रह्मपुरी वनविभागाचे डीएफओ कुलराज सिंग, चिमूरचे वनपरिक्षेत्र अदिकारी चिवंडे घटनास्थळी दाखल झाले आहेत.
