गोंदिया- पंचायत समिती गटविकास अधिकारी तसेच पंचायत समिती घरकुल विभागाच्या सर्व कार्यकारी अभियंता कनिष्ठ अभियंता यांना घेऊन आमदार विनोद अग्रवाल यांनी आढावा बैठक घेतली. गोंदिया तालुक्यातील सध्या सुरू असलेल्या घरकुल च्या कामाचा आढावा घेत मंद गतीने सुरू असलेल्या कामावरून अभियंत्यांना चांगलेच खडेबोल सुनावले. विशेष म्हणजे मार्च 2021 पर्यंत ब यादीतील सर्व लाभार्थ्यांचे घरकुलाचे काम पूर्ण झाले पाहिजे होते परंतु मे महिन्याच्या अखेरीस ही अद्याप कामह पूर्ण झाले नसल्याने आमदार विनोद अग्रवाल यांनी अधिकाऱ्यांची चांगलीच हजेरी घेतली. शासनाच्या योजनेच्या माध्यमातून सर्व लाभार्थ्यांना पक्की घरे मिळायला पाहिजे होते परंतु प्रशासकीय अधिकाऱ्यांच्या तसेच अभियंत्याच्या निष्काळजीपणामुळे कामे पूर्णत्वास जाऊ शकली नसल्याने नागरिकांना प्रचंड त्रासाला सामोरे जावे लागले. गावातील रोजगार सेवक कामाची मागणी करण्यासाठी टाळाटाळ करतात असे आढळून आलेले आहे अशा रोजगार सेवकांवर तत्काळ कार्यवाही करून लाभार्थ्यांचे मस्टर तत्काल तयार करून कामाला सुरुवात करावी. काही रोजगार सेवकांनी कामाची मागणी केली असता त्यावर कोणतीही कारवाई केली जात नसल्याची तक्रार लाभार्थ्यांकडून केली जाते. यासंबंधी चर्चा करत आमदार विनोद अग्रवाल यांनी रोजगार सेवकाकडून सादर केलेले मस्टर तात्काळ मंजूर करून लाभार्थ्यांना काम मंजूर करण्याचे निर्देश दिले. लाभार्थ्यांना हप्ते न मिळाल्याने त्यांच्या घराचे कामे थांबून आहेत, शासनाने घरकुलसाठी पैसे दिले असूनही लाभार्थ्यांना पैसे का दिले जात नाही असाही सवाल उपस्थित केला.
मागील महिनाभर लाभार्थ्यांना शासनाच्या माध्यमातून रेती उपलब्ध करून दिली जाणार होती, परंतु रेतीचे घाट निलाम न झाल्याने लाभार्थ्यांना रेती उपलब्ध होऊ शकली नाही. त्यामुळे स्वस्तातील रेती महागात खरेदी करून लाभार्थ्यांनी स्वखर्चातून घरकुलाचे बांधकाम पूर्ण केले.
तरीही अद्याप लाभार्थ्यांना शासनाच्या माध्यमातून मिळणाऱ्या घरकुलाच्या पैशाचे हप्ते न मिळाल्याने बांधकाम बंद केलेला आहे. कित्येक लाभार्थी घरकुल योजनेचा लाभ मिळूनही कर्जबाजारी झाले असल्याचे आमदार विनोद अग्रवाल यांच्या निदर्शनात आल्यावर त्यांचा अधिकाऱ्यांवर अधिकच पारा चढला. या आढावा बैठकीत आमदार विनोद अग्रवाल यांनी अधिकारी व अभियंता यांना या महिन्याच्या शेवटी म्हणजेच 30 मे पर्यंत सर्व लाभार्थ्यांना त्यांचे घरकुल चे सर्व हप्ते अदा करण्याबाबत सूचना केल्या व असे न केल्यास संबंधित अधिकारी तसेच अभियंता यांच्यावर कारवाई करण्यास विलंब केला जाणार नाही अशी ताकीद दिली. गोंदिया तालुक्यात 23471 घरकुल लाभार्थ्यांना बांधकामाची परवानगी देण्यात आली होती, यापैकी 19477 लाभार्थ्यांना संपूर्ण पैसे अदा करण्यात आले. उर्वरित चार हजार लाभार्थ्यांना अध्याप त्यांचे पूर्ण रक्कम मिळाली नसल्याने त्रासाला सामोरे जावे लागत आहे.
आमदार विनोद अग्रवाल यांनी झिरो पेंडन्सी दाखवत महिन्याच्या शेवटी पर्यंत सर्व लाभार्थ्यांना संपूर्ण रक्कम अदा करण्याचे अधिकारांना ताकीद दिली आहे. असे न झाल्यास संबंधित अधिकारी व अभियंता यांच्यावर कारवाई केली जाणार असल्याचेही यावेळी त्यांनी स्पष्ट केले.
