गोंदिया, दि.2 : 12 नोव्हेंबर 2013 चे शासन निर्णयानुसार क्रीडा व युवक सेवा संचालनालय, महाराष्ट्र राज्य, पुणे तथा जिल्हा क्रीडा परिषद, गोंदिया द्वारा जिल्ह्यातील युवांनी केलेले समाज हिताच्या कार्याचा गौरव व्हावा व युवक विकासाचे कार्य करण्यासाठी त्यांना प्रोत्साहन मिळावे यासाठी जिल्हास्तरावर युवा पुरस्कार प्रतिवर्षी देण्यात येतो. सन 2021-22, 2022-23, 2023-24, 2024-25 च्या जिल्हा युवा पुरस्काराकरीता जिल्हा क्रीडा अधिकारी कार्यालयामार्फत अर्ज मागविण्यात येत आहेत.
सदर पुरस्काराच्या अटी व शर्तीची पुर्तता करणाऱ्या स्वयंसेवी संस्था/मंडळ व युवक, युवती यांनी आपले परिपूर्ण अर्ज दि.10 एप्रिल 2025 पर्यंत कार्यालयीन वेळेत जिल्हा क्रीडा अधिकारी कार्यालय, जिल्हा क्रीडा संकुल, बालाघाट रोड, मरारटोली, गोंदिया येथे सादर करावेत.
जिल्हा युवा पुरस्कार (युवक व युवती स्वतंत्र), तसेच एक नोंदणीकृत संस्था यांना देण्यात येईल. सदर पुरस्कार गौरवपत्र, सन्मानचिन्ह, रोख रक्कम 10 हजार रुपये (युवक व युवती स्वतंत्र). प्रति संस्थेसाठी गौरवपत्र, सन्मानचिन्ह, रोख रक्कम 50 हजार रुपये देवून गौरविण्यात येणार आहे. हा पुरस्कार 1 मे रोजी महाराष्ट्र दिनी वितरीत करण्यात येईल.
पात्रतेचे निकष : पुरस्कारासाठी अर्ज करणाऱ्या अर्जदाराचे महाराष्ट्रात संबंधित जिल्ह्यामध्ये सलग 5 वर्षे वास्तव्य असले पाहिजे. पुरस्कार युवक युवतीचे वय पुरस्कार वर्षातील 31 मार्च रोजी 35 वर्षे पर्यंत असावे. पुरस्कार व्यक्ती किंवा संस्थेस विभागुन दिला जाणार नाही. पुरस्कार मरणोत्तर जाहीर करण्यात येणार नाही. केलेल्या कार्याचे सबळ पुरावे अर्जासोबत जोडणे आवश्यक राहील (उदा. वृत्तपत्र कात्रणे, प्रशस्तीपत्र, चित्रफिती व फोटो इत्यादी). अर्जदार संस्था, युवक व युवतीने पुरस्कार प्राप्त झाल्यानंतर किमान दोन वर्षे क्रीयाशील कार्यरत राहणार असल्याचे हमीपत्र देणे आवश्यक राहील. अर्जदार व्यक्तीचे कार्य हे स्वयंस्फुर्तीने केलेले असावे. एका जिल्ह्यात पुरस्कार प्राप्त करणारी व्यक्ती राज्यातील अन्य जिल्ह्यात युवा पुरस्कारासाठी अर्ज करण्यास पात्र राहणार नाही. केंद्र व राज्य शासनाच्या शासकीय व निमशासकीय कार्यालयातील अधिकारी/कर्मचारी तसेच विद्यापीठ अंतर्गत महाविद्यालयातील प्राध्यापक/कर्मचारी पुरस्कारासाठी पात्र राहणार नाही. अर्जदार संस्था सार्वजनिक विश्वस्त अधिनियम 1860 किंवा मुंबई पब्लिक ट्रस्ट ॲक्ट 1950 नुसार पंजीबध्द असावी. अर्जदार संस्था नोंदणी झाल्यानंतर किमान पाच वर्षे कार्यरत असणे आवश्यक आहे. अर्जदार/संस्थेच्या सदस्याचा पोलीस विभागाने प्रमाणित केलेला चारित्र्य दाखला (संबंधित क्षेत्रातील पोलीस स्टेशन) देणे आवश्यक राहील.
अधिक माहितीकरीता जिल्हा क्रीडा अधिकारी कार्यालय, जिल्हा क्रीडा संकुल, गोंदिया येथे संपर्क साधावा, असे जिल्हा क्रीडा अधिकारी नंदा खुरपुडे यांनी कळविले आहे.
