नवेगावबांध : येथील मुळ रहिवासी आणि सध्या नवोदय विद्यालय तळोधी (बाळापूर) येथे शिक्षण घेत असलेला आशय पुनेश्वर डोंगरवार याची देशातील सर्वोच्च संशोधन संस्था असलेली भारतीय विज्ञान संस्था (आयआयएससी) बंगळुरू (IISC Bangalore Internship) येथे एक महिन्याच्या इंटर्नशिपसाठी निवड झाली आहे. ही निवड महाराष्ट्रातील केवळ पाच विद्यार्थ्यांमधून करण्यात आली असून, आशयचा त्यात समावेश होणे ही नवेगावबांधसह संपूर्ण विदर्भासाठी अत्यंत अभिमानाची बाब आहे.
आशयचे वडील आणि आई हे दोघेही सिंदेवाही तालुक्यातील शाळांमध्ये शिक्षक म्हणून कार्यरत आहेत. घरातून मिळालेल्या शैक्षणिक प्रेरणेचा उपयोग करत आशयने अभ्यास, वैज्ञानिक उपक्रमांमधील सहभाग, तसेच मुलाखतीत उत्कृष्ट कामगिरी केली आणि ही मानाची निवड मिळवली. २९ एप्रिल ते २८ मे २०२५ या कालावधीत आशय भारतीय विज्ञान संस्था, बंगळुरू येथे आपली इंटर्नशिप पूर्ण करणार आहे.
