चंद्रपूर,दि.१४ः ताडोबा-अंधारी व्याघ्र प्रकल्पातील मोहर्ली वनपरिक्षेत्रातील नियतक्षेत्र सितारामपेठ अंतर्गत येणार्‍या भामडेळी गावालगत, इरई धरण परिसरात सोमवार, 14 एप्रिल रोजी वनकर्मचारी गस्त घालीत असताना एक वयस्कर वाघ मृतावस्थेत आढळून आला.वनकर्मचार्‍यांनी या घटनेची माहिती वरिष्ठांना दिली. माहिती कळताच संवस (जंकास-2) संकेत वाठोरे, मोहर्लीचे वनपरिक्षेत्र अधिकारी संतोष थिपे, राज्य वन्यजीव सल्लागार मंडळाचे सदस्य धनंजय बापट, राष्ट्रीय व्याघ्र संवर्धन प्राधिकरणाचे प्रतिनिधी बंडू धोतरे, प्रधान मुख्य वनसंरक्षक यांचे प्रतिनिधी मुकेश भांदककर, ताडोबा-अंधारी व्याघ्र प्रकल्पाचे पशु वैद्यकीय अधिकारी डॉ. कुंदन पोडचेलवार, पशुसंवर्धन विभागाचे सेवा निवृत्त सहाय्यक आयुक्त डॉ. पुरुषोत्तम कडूकर, मोहुर्लीचे पशु वैद्यकीय पर्यवेक्षक मिलिंद जक्कुलवार तसेच वनपाल व क्षेत्रीय वनरक्षक यांनी उपस्थित होऊन पाहणी केली. या वाघाची ओळख पटली नसून, त्याचा मृत्यू 15 ते 20 दिवसांपूर्वी झाल्याचा अंदाज वनविभागाने वर्तविला आहे.
31 मार्च 2025 रोजी शेतकर्‍यांनी शेतातील पुंजने जळण्यासाठी लावलेल्या आगीमध्ये इरई धरण परिसरातील गवताळ भागसुद्धा जळला आहे. मृत वाघाचे नखे, दात, हाडे, शाबूत असून, आगीमुळे ते अर्धवट जळाल्याच्या स्थितीत दिसून आल आहे. ही आग वाघाच्या मृत्यूनंतर लावण्यात आली आहे.कारण मृतदेहाच्या बाजूला मांस सडल्यानंतर लागलेल्या अळ्यासुद्धा जळाल्याचे दिसून आले. मृत वाघाचे पशु वैद्यकीय अधिकारी यांनी विच्छेदन करून नमुने गोळा केले आहे. उत्तरीय तपासणीमध्ये मृत वाघाच्या मृत्यूचे कारण स्पष्ट होणार आहे. मृत वाघाचे डीएनए ओळखीसाठी सीसीएमबी हैदराबाद येथे पाठविण्यात येणार आहेत.
या परिसरामध्ये 16 मार्च 2025 पर्यंत नियमितपणे टी-24 वाघिण व तिचे 3 बछडे दिसून येत होते. फेब्रुवारी 2025 पासून बछडे 2 वर्षाचे झाल्याने ते या वाघिणीपासून स्वतंत्र झाले होते. 16 मार्च 2025 पासून ही वाघिण दिसून न आल्याने शोध घेणे सुरु होते. त्यामुळे मृत वाघ हा टी-24 असण्याची शक्यता वनविभागाने वर्तविली आहे.या प्रकरणी वनगुन्हा क्रमांक 09643/241055 नोंद करण्यात आला असून, पुढील तपास ताडोबा अंधारी व्याघ्र प्रकल्पाचे उपसंचालक कुशाग्र पाठक व संवस (जंकास-2) संकेत वाठोरे यांच्या मार्गदर्शनात वनपरिक्षेत्र अधिकारी संतोष थिपे करीत आहे.
