गोंदिया,दि.22- महाराष्ट्र शासनाच्या माध्यमातून गोंदिया नगरपालिकेच्या (MC) अग्निशमन दलात (Fire Brigade) आणखी एक नवे वाहन दाखल झाले आहे. आग, अपघात, इमारत कोसळणे अशा घटनांमध्ये तत्काळ मदत पोहचवण्यासाठी सर्व सुविधायुक्त असलेले शीघ्र प्रतिसाद वाहन आपत्कालीन परिस्थितीत (Emergency Situation) मदतीसाठी, नागरिकांना वाचवण्यासाठी या वाहनाचा मोलाचा उपयोग होईल, असे मत जिल्हाधिकारी प्रजित नायर यांनी व्यक्त केले.
नगरपालिकेच्या अग्निशमन दलाच्या बळकटीकरणासाठी जिल्हाधिकारी प्रजित नायर यांच्या हस्ते या वाहनाचे दि.21 एप्रिल 2025 रोजी लोकार्पण करण्यात आले. यावेळेस निवासी उपजिल्हाधिकारी भैय्यासाहेब बेहेरे, जिल्हा आपत्ती व्यवस्थापन अधिकारी राजन चौबे, अग्निशमन अधिकारी निरज काळे व जिल्हा आपत्ती व्यवस्थापन शोध बचाव पथकाचे सदस्य व अग्निशमन विभागातील कर्मचारी प्रामुख्याने उपस्थित होते.
वाहन आवश्यक सर्व साहित्याने सज्ज
आधुनिक शीघ्र प्रतिसाद वाहन आपत्कालीन परिस्थितीत त्वरित घटनास्थळी पोहोचण्यासाठी त्याची रचना करण्यात आली आहे. वाहनात प्राथमिक उपचार, स्ट्रेचर उपलब्ध आहेत. आगीवर जलद नियंत्रण मिळवण्यासाठी ३०० लिटर पाण्याची व ५० लिटर फोमची क्षमता आहे. इमारत कोसळल्यास किंवा एखाद्या आपत्कालीन परिस्थितीत, अपघातस्थळी मदत कार्यासाठी, बचाव कार्यासाठी आपत्कालीन टूल बॉक्स, लाईफ जॅकेट, वूड कटर आदी साहित्य सामग्री उपलब्ध असणार आहे. त्यामुळे आपत्कालीन परिस्थितीत तत्काळ मदत पोहचवण्यासाठी या वाहनाचा उपयोग होईल, असे जिल्हाधिकारी प्रजित नायर यांनी या वेळी सांगितले.
शहराचा विस्तार वाढत असल्याने अग्निशमन सेवा बळकट करण्याची गरज आहे. राज्य शासनाचे या विषयाकडे लक्ष वेधल्यावर एक वाहन तत्काळ उपलब्ध केले आहे. सदर वाहन बाजार परिसरात किंवा अत्यंत अरुंद रस्त्यांवर घटनास्थळी पोहोचण्यासाठी उपयुक्त आहे, त्यामुळे अग्निशमन दलात वाहनांची संख्या वाढवण्यासाठी व अग्निशमन केंद्रांची उभारणी करण्यासाठी प्रयत्न सुरू आहे. अशी माहिती जिल्हाधिकारी प्रजित नायर यांनी दिली.
