;मुलीचा जागीच मृत्यू तर जावई गंभीर जखमी;आँनर किलिंगच्या घटनेने जळगाव हादरले
जळगाव:-मुलीने प्रेमविवाह केल्याच्या रागातून वडिलांनी आपली मुलगी आणि जावई यांच्यावर गोळीबार केला आहे. या घटनेत मुलगीचा जागीच मृत्यू झाला आहे तर जावई गंभीर जखमी झाला आहे. जळगाव जिल्ह्यातील चोपडा शहरात ही खळबळजनक घटना घडली आहे. या ऑनर किलिंग घटनेत संतप्त लोकांनी गोळीबार करणाऱ्या मुलीच्या वडिलांना बेदम मारहाण केल्याने त्यांची प्रकृतीही गंभीर असल्याची माहिती समोर आली आहे. सध्या त्यांच्यावर जळगाव जिल्हा रुग्णालयात उपचार सुरू आहे.
पोलिसांनी दिलेल्या माहितीनुसार, एक वर्षांपूर्वी तृप्ती मांगले आणि अविनाश वाघ यांनी प्रेमविवाह केला होता. हा विवाह तृप्तीचे वडील किरण मांगले यांना मान्य नव्हता. अविनाशच्या एका नातेवाईकाच्या लग्नसोहळ्यासाठी तृप्ती आणि अविनाश चोपडा येथे आले होते. किरण मांगले यांना मुलीने प्रेमविवाह केल्याचा राग मनात होता. हाच राग मनात धरून आलेल्या किरण मांगले यांनी तृप्ती आणि अविनाश यांच्यावर गोळीबार केला. त्यांनी तीन राउंड फायर केले. यात तृप्तीचा जागीच मृत्यू झाला. तर अविनाश याच्या पाठीला गोळी लागली. तर दुसरी गोळी हाताला लागल्याने तो गंभीर जखमी झाला आहे. या घटनेनंतर परिसरात एकच खळबळ उडाली. तृप्तीचे वडील किरण अर्जुन मांगले हे सीआरपीएफचे निवृत्त अधिकारी (पीएसआय) आहेत. त्यांनी त्यांच्या परवाना असलेल्या बंदुकीचा वापर करुन हा गोळीबार केला.
या घटनेनंतर संतप्त झालेल्या नातेवाईकांनी किरण मांगले यांना बेदम मारहाण केली. यात ते गंभीर जखमी झाले. त्यांच्यावर जळगावातील रुग्णालयात उपचार सुरू आहेत. पोलिसांनी तातडीने घटनास्थळी धाव घेऊन परिस्थिती नियंत्रणात आणली. तसेच यानंतर अविनाशलाही जळगावच्या जिल्हा रूग्णालयात दाखल करण्यात आले आहे. याप्रकरणी चोपडा शहर पोलीस ठाण्यात रात्री उशिरा गुन्हा दाखल करण्यात आला. पोलिसांनी किरण यांनी या गुन्ह्यात वापरलेली पिस्तूल जप्त केली आहे. जळगावचे पोलीस अधीक्षक डॉ. महेश्वर रेड्डी यांनी या घटनेची माहिती दिली आहे. या घटनेमुळे चोपडा शहरात खळबळ उडाली आहे. सध्या पोलीस या घटनेचा पुढील तपास करत आहेत.
