गोंदिया : जिल्ह्यातील चिचगड पोलीस ठाण्यांतर्गत येत असलेल्या ढासगड जंगल परिसरात एका अपंग गर्भवती महिलेचा कोयत्याने निर्घृण खून केल्याप्रकरणी प्रमुख जिल्हा व सत्र न्यायालयाने आज (ता.29) दिलेल्या निकालात खून करणार्‍या तीन आरोपींना जन्मठेप व 10 हजार रुपये दंडाची शिक्षा ठोठावली आहे. मो. समीर अस्लाम शेख (वय 26 रा. वार्ड क्र. 4, बाजार वार्ड लाखनी, जि.भंडारा), आशिफ शेरखाँ पठाण (वय 38 रा. बाबा मस्तानी, जि. भंडारा), प्रफुल्ल पांडुरंग शिवणकर (वय 25 रा. दुधा, पो. डबा, ता. उमरेड, जि. नागपूर) अशी जन्मठेपेची शिक्षा ठोठावण्यात आलेल्या आरोपींची नावे आहे.
जिल्ह्यातील चिचगड पोलीस ठाण्यांतर्गत येत असलेल्या ढासगड जंगलात एका 25 ते 30 वर्षीय अनोळखी अपंग गर्भवती महिलेचा धारदार हत्याराने गळा कापून खून करून रस्त्याच्या कडेवरून ओडत नेत डांबरी रोडपासून 25 फूट अंतरावर फेकून दिल्याची घटना 23 जुलै 2021 रोजी 8 वाजताच्या सुमारास उघडकीस आली होती. या प्रकरणी फिर्यादीच्या तक्रारीवरून चिचगड पोलीस ठाण्यात अपराध क्र. 70/2021कलम 302, 201 (ब), 34 भा.द.वि. प्रमाणे गुन्हा नोंदवून, वरिष्ठांच्या निर्देशानुसार गुन्ह्याच्या तपास केला असता आरोपी मो. समीर अस्लाम शेख, आशिफ शेरखॉं पठाण व प्रफुल्ल पांडुरंग शिवणकर या तीन आरोपींना नागपूर जिल्ह्यातील बुटीबोरी व भंडारा येथून अटक करण्यात आली होती. या प्रकरणात तत्कालीन तपासी अधिकारी प्रथम तपासी अधिकारी चिचगडचे पोलीस उपनिरीक्षक मनोहर इस्कापे, उपविभागीय पोलीस अधिकारी जालिंदर नालकुल यांनी तपास पूर्ण करुन तिन्ही आरोपींच्या विरोधात न्यायालयात सबळ साक्ष पुरावे, परिस्थितीजन्य पुरावे, गोळा करून दोषारोप पत्र दाखल केले होते. दरम्यान, न्यायालयात गुन्ह्याचे से. ट्रा. केस क्र. 130/2021 दिनांक 29/10/2021 प्रमाणे खटला चालविण्यात आला. ज्यामध्ये खटल्याच्या युक्तिवादानंतर सबळ साक्ष पुराव्यावरून आरोपीतांविरुद्ध गुन्हा केल्याचे दोष सिद्ध झाल्याने जिल्हा व सत्र न्यायालय गोंदियाचे प्रमुख जिल्हा व सत्र न्यायाधीश वानखेडे यांनी आज शनिवारी गुन्ह्यातील तिन्ही आरोपींना जन्मठेपेची शिक्षा व दहा हजार रुपये आर्थिक दंडाची शिक्षा ठोठावलेली आहे. या प्रकरणात सरकार पक्षातर्फे न्यायालयीन कामकाज सहाय्यक संचालक व सरकारी अभियोक्ता गोंदिया जिल्हा यांनी काम पाहिले त्यांना ऍडव्होकेट प्रणिता कुलकर्णी यांनी सहकार्य केले. सदर गुन्ह्याचे कोर्ट पैरवी कामकाज महिला नायक पोलीस शिपाई रिम्पी हुकरे यांनी कामकाज पाहिले.
