अर्जुनी-मोरगाव : शहरात नगरपंचायतमार्फत विकासकामांना गती मिळत आहे. नगरातील 17 प्रभाग चक्क आणि लखलखीत होण्यासाठी पहिल्या टप्प्यात सहा प्रभागांमध्ये 12 हायमास्टचे लोकार्पण करण्यात आले. नगराध्यक्षा मंजुषा बारसागडे यांच्या हस्ते हायमास्टचे लोकार्पण झाले.
या वेळी सभापती दाणेश साखरे, संजय पवार आणि नगरसेवक उपस्थित होते. नुकतेच शहरात पाच कोटी निधी अंतर्गत टूमदार रस्ते, भूमिगत गटारे यांचे भूमिपूजन नुकतेच पार पडले. मूलभूत सुविधांच्या प्रगतीपथावर नगरपंचायतची वाटचाल सुरू आहे. चौदाव्या वित्त आयोगातून 12 हायमास्ट तर दुसऱ्या टप्प्यात महाराष्ट्र सुवर्ण जयंती नगरोत्थान योजना आणि दलितेत्तर योजनाअंतर्गत उर्वरित 11 प्रभागांमध्ये 21 हायमास्ट लागणार आहेत. 70 लक्ष रुपयाचे निधीतून शहरात लखलखाट होणार आहे.
शहराच्या सर्वांगीण विकासासाठी अधिकारी आणि पदाधिकारी कार्य करीत आहेत. दिवाळीपर्यंत नागरिकांच्या सुविधांकरिता प्राधान्याने विकासकामांना गती मिळेल. पुढील काळात शहरातील प्रलंबित कामे पूर्णत्वास नेण्याकडे आमची वाटचाल आहे, अशी माहिती नगराध्यक्ष मंजुषा बारसागडे यांनी लोकार्पन दरम्यान दिली.या वेळी नगरसेवक सर्वेश भुतडा, एसकुमार शहारे, राधेश्याम भेंडारकर, अतुल बनसोड, सागर आरेकर, ममता भय्या, इंदू लांजेवार आणि लाईनमन मिथुन कोचे उपस्थित होते.
