कलेत पहावयास मिळते संविधानाचे प्रतिबिंब-कुलगुरू डॉ. माधवी खोडे चवरे

नागपूर :कला कधीही जात, धर्म, लिंगभेद याचा विचार करीत नाही, त्यामुळे भारतीय संविधानाचे प्रतिबिंब कलेत पहावयास मिळते, असे प्रतिपादन राष्ट्रसंत तुकडोजी महाराज नागपूर विद्यापीठाच्या माननीय प्रभारी कुलगुरू डॉ. माधवी खोडे चवरे (भाप्रसे) यांनी केले. अखिल भारतीय आंतर विद्यापीठ सांस्कृतिक महोत्सवात विद्यापीठाच्या चमूने स्किट आणि समूहगान प्रकारात प्रथम क्रमांक प्राप्त केला. अखिल भारतीय स्तरावर विद्यापीठाचा नावलौकिक वाढविणाऱ्या कलावंत विद्यार्थ्यांचा सत्कार जमनालाल बजाज प्रशासकीय भवनातील सभागृहात शुक्रवार, दि. ४ एप्रिल २०२५ रोजी पार पडला. यावेळी कुलगुरू मार्गदर्शन करीत होत्या.

कार्यक्रमाचे अध्यक्षस्थान कुलगुरू डॉ. माधवी खोडे चवरे यांनी भूषविले तर प्रमुख अतिथी म्हणून कुलसचिव डॉ. राजू हिवसे, राज्यपालनामित व्यवस्थापन परिषद सदस्य डॉ. समय बनसोड, अधिसभा सदस्य प्रथमेश फुलेकर, विद्यार्थी विकास विभाग प्रभारी संचालक डॉ. विजय खंडाळ यांची यावेळी प्रामुख्याने उपस्थिती होती. विद्यार्थी म्हणून सांस्कृतिक गरजांकडे दुर्लक्ष न करण्याचे आवाहन करीत तुमच्यातील कलावंत जपा असे पुढे बोलताना कुलगुरूंनी सांगितले. कृत्रिम बुद्धिमत्तेमुळे अनेक चुकीची माहिती समोर येत आहे. त्यामुळे कोणताही तणाव न बाळगता महाविद्यालयासह सर्वच सांस्कृतिक कार्यक्रमांमध्ये सहभागी होत कलागुणांचा अविष्कार साधा, असे कुलगुरू म्हणाल्या. स्पर्धेत सादर केलेल्या स्किट मधील विचार मर्यादित ठेवू नका तर त्याला प्रत्यक्षात आपल्या जीवनात उतरवायला हवे. दुसऱ्याला दोष न देता स्वतःच्या आवडीने जीवन जगताना मनाला शांती प्राप्त होते. त्याचप्रमाणे सांस्कृतिक कलागुण संपूर्ण आयुष्यात जपून ठेवा, असे आवाहन देखील कुलगुरूंनी केले. या कार्यक्रमात अखिल भारतीय स्तरावर प्रथम क्रमांक प्राप्त केलेल्या समूहगान तसेच स्किट प्रकारात सहभागी विद्यार्थ्यांचा कुलगुरूंच्या शुभहस्ते मेडल तसेच प्रमाणपत्र देत सत्कार करण्यात आला.

कुलगुरूंच्या हस्ते कलावंत विद्यार्थ्यांचा सत्कार

अमेठी विद्यापीठ नोएडा येथे झालेल्या अखिल भारतीय आंतर विद्यापीठ सांस्कृतिक महोत्सवात विद्यापीठाच्या चमुने स्कीट, समूहगान तसेच प्रश्नमंजुषा या तीन प्रकारात सहभाग नोंदविला होता. यातून स्कीट आणि समूहगान प्रकारात विद्यापीठाच्या चमुने प्रथम क्रमांक पटकाविला. समूहगान संघामध्ये वसंतराव नाईक शासकीय समाज विज्ञान संस्थेची विद्यार्थिनी तेजस्विनी खोडतकर, सुयोग देवळकर व चेतन नागोसे, आर.एस. मुंडले महाविद्यालयाची राधा ठेंगडी, एलएडी महाविद्यालयाची आयुशी देशमुख, विसेन्ट पलौटी महाविद्यालयाची निधी इंगोले, सिटी प्राईम कॉलेजची निधी रानडे, हिस्लॉप महाविद्यालयाची इंद्राणी इंदुरकर, रामदेवबाबा अभियांत्रिकी महाविद्यालयातील याज्ञिक बंगाले यांचा समावेश होता. स्किट चमूमध्ये विद्यापीठाच्या पदव्युत्तर हिंदी विभागातील नितीन मरसकोल्हे हिस्लॉप महाविद्यालयातील मोहित सरकार, इंद्राणी इंदुरकर, चिराग शुक्ला व शिफा अन्सारी तर व्हिएमव्हीचा युगलहंस मरकप यांचा समावेश होता. स्किटचे दिग्दर्शन तथा प्रशिक्षक म्हणून श्री सारंग गुप्ता यांनी कार्य पाहिले. संघ व्यवस्थापक म्हणून ललित कला विभाग प्रमुख डॉ. संयुक्ता थोरात, श्री सारंग गुप्ता यांनी सहभाग घेतला. समूहगान डॉ. दीपश्री पाटील यांनी संगीतबद्ध केले. प्रशिक्षक म्हणून सोनाली बोहरपी तर सांस्कृतिक समन्वयक म्हणून श्री प्रकाश शुक्ला यांनी जबाबदारी पार पाडली.