गडचिरोली : शासनाच्या 2005 पासून सुरू झालेल्या आत्मसमर्पण योजनेत आतापर्यंत 704 माओवाद्यांनी पोलिसांपुढे आत्मसमर्पण केले आहे. त्यात 2022 ते आतापर्यंत एकुण 55 जहाल माओवाद्यांनी आत्मसमर्पण करून सन्मानाने जगण्याचा मार्ग पत्करला. त्यात गेल्या तीन महिन्यात 22 माओवाद्यांनी नक्षल चळवळीचा त्याग केला. या आत्मसमर्पित माओवाद्यांच्या पुनर्वसनाचा एक भाग म्हणून गडचिरोली पोलीस दलाच्या वतीने त्यांच्यासाठी ‘प्रोजेक्ट संजीवनी’ची सुरुवात 14 एप्रिल रोजी करण्यात आली.
पोलीस अधीक्षक नीलोत्पल यांच्या संकल्पनेतून साकारलेल्या या प्रकल्पात आत्मसमर्पणानंतर केंद्र व राज्य शासनाच्या योजनेतून मिळणाया बक्षिसाच्या रकमेचे सुलभ वितरण, भूखंड मिळवून देऊन प्रधानमंत्री आवास योजना व शबरी आवास योजनेअंतर्गत गृहप्रकल्प उभारणे, आधारकार्ड, पॅनकार्ड, रेशन कार्ड, जॉब कार्ड आदी ओळखपत्रे उपलब्ध करून देणे, स्वयंरोजगारासाठी मोटार ड्रायव्हिंग, शिवणकाम, ब्युटीपार्लर, पशुपालन इत्यादी प्रशिक्षण, लॉयड्स मेटल्स अॅण्ड एनर्जी लि. सारख्या नामांकित कंपन्यांमध्ये वेल्डर, टेक्निशियन, ऑपरेटरचे प्रशिक्षण व रोजगाराची संधी, महिलांच्या सक्षमिकरणासाठी महिला बचत गटांची स्थापना, डोळ्यांच्या उपचारासाठी “ऑपरेशन रोशनी”, तसेच नसबंदी रिओपनिंग शस्त्रक्रिया, मानसिक व सामाजिक विकासासाठी समुपदेशन, मानसोपचार व ध्यान शिबिरे, आत्मसमर्पित माओवादी सदस्यांकरिता सामूहिक विवाह सोहळा व इतर योजनांची नियोजनबद्ध अंमलबजावणी केली जाणार आहे.
सदर प्रोजेक्ट संजीवनीच्या शुभारंभप्रसंगी पोलीस अधीक्षक नीलोत्पल यांच्या हस्ते 4 आत्मसमर्पित माओवादी सदस्यांकरिता बनविण्यात येणाया सर्व सोयी-सुविधांनी सुसज्ज अशा स्वतंत्र 4 रो-हाऊस बांधकामांचे भूमिपूजन करण्यात आले. याप्रसंगी अपर पोलीस अधीक्षक (अभियान) यतिश देशमुख, गडचिरोलीचे उपविभागीय पोलीस अधिकारी सुरज जगताप, प्रभारी पोलीस उपअधीक्षक (गृह) विनोद चव्हाण, स्थागुशाचे पोनि. अरुण फेगडे, जिविशाचे पोनि. निखिल फटींग, गडचिरोली ठाण्याचे पोनि. रेवचंद सिंगनजुडे तसेच विविध शाखांचे पोलीस अधिकारी व अंमलदार आणि 50 पेक्षा अधिक आत्मसमर्पित माओवादी सदस्य उपस्थित होते.या कार्यक्रमाच्या यशस्वीतेसाठी आत्मसमर्पण शाखा गडचिरोलीचे प्रभारी अधिकारी पोउपनि.नरेंद्र पिवाल व अंमलदार यांनी परिश्रम घेतले.
